Kai Iyus (B.Sanderta)

                Nini Imah tatawa galak, mandangar pamandiran laki sidin kai Iyus, handak balajar maumpinak macan.
               Sagan nangapa ? Imbah diumpink diingu pulang. macan tu liar. Batamu macan haja ngalih, apalagi maumpinak. Macam-macam haja nang tuha lali' , ujar ni imah mamparucus.
               Kai Iyus takurihing. Di pacul sidin kupiah jangang, lalu di sangkutakan ka tanduk minjangan di tawing halat.

               "Aku ingat kita bahari, lagi anum. Kuambil ikam jadi bini ku"

               '' Manyasal ?" ujar nini Imah sambil takurihing takang.
  
               "Siapa nang manyasal ? Pangrasaku makin lawas makin rami".

               Kai iyus manjuhut kakamban-tangkuluk nini imah. "Lagi balum baranak, dahulu ikam sandu, kada tapi banyak bunyi. Baranak saikung bisa babunyi. Baranak tiga kaya latupan cabi. Wayahini aku sabatik, ikam sapuluh batik. Rami pangrasaku.

               "U....kaya itu lah, jadi maumpinak macan, artinya maumpinak aku lah ? Lamun kadada si macan ini kadada jua cucumu nang di Jakarta, Yogya, Surabaya".

              "Nah, masih satu banding sapuluh, anu, umanyaai. Di jakarta, ingatlah kita mambawa cucu manonton sirkus. Kupikir kanapa macan-macan kawa di umpinak??"
           
              Antara rumah Kai Iyus ka langgar kira-kira lima puluh dapa. Saban malam bila imbah malajari kakanakan mangaji, sidin malibasi bubuhan si Acak nang bagarumbul banyanyian. Tacium bau ganyir, bau saparitus, bau macam-macam.

             Kai Iyus kada handak malibas disitu jakanya ada kertak lain. Kada papa pang, cuma kada handak baurusan lawan bubuhan si Acak.

             Si acak pimpinan garumbulan lalakian bagadang di situ.
 
             Sudah barapa ikung urang luar kampung nang umpat lalu di pajaki bubuhannya.

              Malam ahad samalam, ujar kabar nini Imah, salasiah anak guru Bahrun di rampok mi guringnya.

              "Untung nang di rampok cuma mi guring", pikir kai Iyus sambil bajikir.

              Si Acak kalihatan baruku, lalu api rukunya digisang kaawaknya : Nang lain, baampik.

              Kai Iyus iincaan batuk.

              Badun, Abul ,Amak ,Ikur baurak mambaari jalan.

              Si Acak rupanya papaningan, tarumpak Kai Iyus.

              Kalihatan ulih sidin, gambar kabibitak di tangan Acak bakambuh lawan panau wasi.

              "Assalamu alaikum", ujar Acak.

              "Alaikum salam", Kai Iyus manyahut.

              "Urang dihukum, mancuntan hayam", Ujar acak maulu-ulu.

              Kai Iyus tarus bajalan, sambil bajikir.

             "Banganga badahulu, hanyar baucap", jar Kai Iyus manasihati si Acak.

             Si Acak tatunduk, kada sanggup batingadah, apalagi maitihi mata Kai Iyus nang habang nang kaya mata iwak barah mata.

            Si Acak Hiran, kanapa mata sidin habang kaya itu. Padahal  Kai Iyus itu biar pamandiran, tapi muha sidin tatap nang kaya kada bamamai.

           "Kakawannya Badun, Amak, Abul, Ikur, parusutan baundur ka higa rumah. Walakin baundur, tapi tatap badadangar.

            "Dimana ikam maandak utak, Cak? Aku ini guru mangaji. Sama sekali kada tahu SDSB. Datang-datang ikam minta angka", Kai  Iyus manimbali.

           "Mana anak buah ikam nang tadi ada disini ?"

           Badun, Abul, Amak, Ikur bagimit masuk ka rumah, bajurut nang kaya saluang mudik. Maklum, si Acak Katua Gong Baountat Calymboay, lamun kada lakas masuk, mambusiahlah di amuk si Acak.

           Dalam hati si Acak, manyasal hakun disuruh kakawalannya minta numur,minta angka SDSB lawan Kai Iyus.

           "Bungulnya aku hakun di suruh bubuhan bilalang sambah nangini". si Acak bagusar dalam hati.

           "Nah sudah takumpul bububhan panimbak-panimbak bayaran. Aku tahu gawian bubuhan ikam. Malam bagadang, bamasakan, ular sawa di makan, ayam itik urang di cuntan. Masya Allah, banyanyian, kada tahu urang bakakajian di subalahnya , rasa harat, rasa wani, pangrasa jagau. Mun ada urang lalu, minta duit, kada mambari di cabutakan lading.

             Lawan aku, hari ini tatimbak hati. Ayu siapa nang jagau, maju satu-satu, atawa sabarataan. Ayu Cak, suruh anak buah mu !"

             "Umailah, disasadangi pang abahnya bamamai latui-latui, supan kadangaran jiran subalah manyabalah, ujar nini Ima, bini Kai Iyus.

             "Mun damintu, ganti aku bamamai", ujar Kai Iyus.

             "Bubuhan jagau, hadangi ikam", ujar Kai Iyus, lalu masuk ka dalam.

             "Badimapa garang, maka bubuhan ikam ni tapaduhal lawan abahnya ? nini Imah batakun sambil manggaru kapala sidin.

             "Ini, pang, bubuhan bilalang sambah, nih pang manyuruh ulun, ni ai", ujar Acak manunjuki kakawanannya.

             "Manyuruh apa?"

             "Minta numur" ujar Acak.

             "Numur apa ?"

            "Angka" ujar Badun

            "Angka SDSB", ujar Abul.

            "Esbe itu apa ?"

            "Piyan kada mangarti pang ni ai" ujar Amak.

            "Ya am, mana aku mangarti pamandiran wayah ini. Esbe-esbe numur, angka, jaman sudah banyak baubah, adaai mandangar, tuh, lakinya si Habibah ujar habar mauk esbe. Bahari kadada nang damintu, mun ada mauk gadung, mauk jaring sampai kada kawa bakamih. Lamun mauk esbe kada kawa bakamih jua lah Cak ?"

           "Kada kawa manukar baras !" ujar Kai Iyus manjawab, hanyar datang di dalam sambil mambawa tikuan, cangkir.


           Si Acak cangang lawan kakawanannya , hiran bin ganjil.

           "Aku tahu si Acut lakinya si Habibah, mauk SDSB, gawian mambica. Bajual tinjakan, saban minggu manukar SDSB sampai kadada mambawa bulik duit. Habibah tapaksa kada bamasak, kada kawa manukar baras !"

          "Astaghfirullah, kanapa manyambati urang abahnya, Dusa, dusa abahnya-ai ".

          "Tadi ikam manyambati jua, dusa, dusa umanya ai?"
         
          Kai Iyus takurihing lalu baucap lawan Acak, "Malam Sanayan lah !"

          "Aku paling muar, bila aku mambari kada ditarima !"

          Acak bakidip mata lawan Badun, Badun manggawil lawan Abul, Abul manguit Ikur lawan batis, Ikur manyinggul Amak, Amak maambil cangkir lalu manginum kupi, lalu lakas maandak.

          "Kanapa ?" ayu nginum, tampulu hangat".

          Barataan manginum, sakalinya barataan lakas maandak sambil mamusut bibir.

          "Pahit ?" ujar Kai Iyus.

          "Inggih, pahit kai ai", ujar Ikur bawani.

          "Supaya tahu, Kupi kucampur panawar sampai, kada bagula.

          Pahit, tiap nang pahit musti jadi ubat.

          Kai Iyus bujur-bujur urang tuha nang mamingkuti janji, saban mahadap Arba malam Kamis bubuhan Acak dibari sidin angka.

          Acak lawan kakawanannya nang balima wajib jua maingkuti janji. Janjinya kada banyak, cuma saban hari mambari makani itik Kai Iyus nang baribu banyaknya lawan balajar mangaji dahulu hanyar kaluar angka.

         Bila hari Arba dibari sidin hintalu 100 biji saikung, tasarah handak di jual atanapi diharamakan.

         Bubuhan Acak kada tapikir, kanapa angka Kai Iyus lapas tarus.

         Nini Imah basingguguk manangis. Acak lawan kakawanannya manjanguk. Kai Iyus garing. Acak sidin tabujur kada sing garakan. Bahinak tunggal bakasan.

         Acak tunduk basingguguk, nang lain talukup.

         "Abahnya aku jangan di tinggalakan," nini Imah maragap Kai Iyus.

         "Ulun banyak-banyak minta rila," ujar Acak sambil manangis. Nang lain manangisan jua.

         "Nini Imah badiri sambil baucap :
      
         "Kiawakan duktur, lakasi mudahan kawa tatulung."

         "Acak badiri : Jagai sidin, ulun nang mancari duktur !"

          Kai Iyus mambuka mata, tatawa, lalu bangun.

          "Ai Cak, kanapa manangis ? Aku kada garing, sigar haja."

          Acak sambil takurihing manyahut :

          "Kami takutan mambusialah kadada nang bamamai lagi."

          Nini Imah maambil tangkulak lalu mahambat lawan Kai Iyus.

          "Bapala urang tuha lali mangalilu !"

          Kai Iyus manjuhut tangkulak, lalu baucap :

          "Isuk kita mandatangi cucu ka Jakarta,lalu malihat sirkus kaya apa maumpinak macan."